السلام عليكم ورحمه الله وبركاته
كيف الحال يا اخوان ؟
اليوم فاضي ماعندي شغل قلت خلني احوس في موتري ( شروكي ) فحبيت اني انظف الثروتل بدي لانه اذا كان وسخ يكون من الاسباب على كلام الاخوان اللي تموت عزم الموتر
قبل كل شي اعتذر عن ضعف جودة الصور والسبب الرئيسي يعود إلى جوالي العزيز
الثروتل بدي للي ما يعرفه: هو بوابة دخول الهواء الى الثلاجة ، فلازم يكون الهوا اللي يدخل للثلاجه نظيف عشان ما يدمر عليك الموتر في المستقبل ويطيح من عزمه ..
المقادير
1- بخاخ اي سي ديلكو منظف الكلبليتر سعره (15) ريال
2- مفتاح حساس (النجمه ) مقاس (T20)
3- مفك 10 ( يفضل أن يكون تماتيك عشان الوقت )
الخطوه الاولى :
نبدا نفك وصله الهوا اللي توصل بين الفلتر وبين الثروتل بدي
الخطوة الثانيه :
نفصل افياش الحساسات الثلاثه ونفك الحساسات ، بعدين نبدا نفك المسامير الاربعه اللي تثبت الثروتل بالثلاجه بمفتاح 10 ، ونفصل سلك دعسه البنزين ( تفصل بالسحب تحاول تطلعها ) عشان نقدر نطلع الثروتل بدي برا
( اعتذر للاخوان عن عدم تصويري لهالخطوات لان فكره التصوير جتني وانا في اخر مراحل التنظيف
)
هذي الحساسات الثلاثه
الخطوة الثالثه :
بعد ما نطلع الثروتل بدي برا نجيب اي شي نظيف ونغطي الفتحه عشان ما يدخل تراب او اي اوساخ..
الخطوة الرابعه :
نبدا بعملية التنظيف وهي انك تبخ على الثروتل من بخاخ اي سي ديلكو وراح تشوف الوسخ اللي بينزل من الثروتل بالهبل
طبعاً انت تفرك الثروتل بفوطه أو بأي شي لانه يكون عالق بالجوانب زيت أو تراب اكل عليه الدهر وشرب .... وعلى قدر فضاوتك بتظبط شغلك
( والاهم وانت تنظف انتبه لا تكسر الوجه حق الثروتل ..
)
طبعاً الثروتل كان وسخ لدرجه محد يتوقعها شوفو الوسخ اللي طلع منه ..
احب انبه الاخوان انتبهو تستخدمون البخاخ تحت ارضيه بلاستيك لانه دمرها علي
اشوى ان ابوي ما شافني ولا كانت علوم
الثروتل بعد عمليه التنظيف
من الخلف
في النهاية
اتمنى انكم تكونوا عرفتو وفهمتوا الطريقه اكيد في المنتدى ناس خبيرين ما شاء الله عليهم ما يحتاج نبين لهم هالشي وصدقوني اللي نزلته بسبب متابعتي لهم في المنتدى وطريقه الفك والتركيب وحبي لميكانيكا السيارات ولو اني خريج قانون
لكن حبيت اللي ما يعرف لهالاشياء ويحب يسويها بس ما يعرف على الاقل يشوف وتكون عنده ولو خلفيه بسيطه
واحب اشكر اخوي 3asheg - rb3 على رحابه صدره وانا مستغرب انه ماقفل جواله لاني ازعجته وادق عليه ويكون نايم ( عاد هو اللي يهديه ينام في اوقات ميب حقت نوم ابد خخخخخخخخخخخ )
<< بيتشوت من عاشق ...
والاهم دعواتكم لي ومنكم نتعلم ..